Histoire de Saint Loys, IX du nom, roy de France

Très noble et puissant seigneur, vous plaise savoir que feue ma très excellante dame votre mère que Dieu absoille, en son temps pour la grant amour qu'elle avoit à moy, aussi qu'elle savoit bien que très loiallement j'avoye amé et servy ledit seigneur roy Saint Loys son bon espoux, et suivy en maints lieux et places : me pria et requist tant affectueusement qu'elle put, que pour l'onneur de Dieu je feisse faire et escrire un livret et traité des très dignes et très saints faitz et ditz dudit seigneur roy Saint Loys. Ce que très humblement luy promis faire et accomplir à mon povoir.

Et parce que à vous, Très excellant et puissant seigneur, qui estes l'aisné filz et hoir, et qui avez succédé au royaume après ledit seigneur roy Saint Loys vostre dit père, envoye le livret, comme congnoissant que à nul autre vif plus que à vous n'appartient de l'avoir. Affin que vous, et tous autres qui l'aurez et l'orrez lire, y puissiez prouffiter par imitation des euvres et exemples que y trouverez, et que Dieu nostre père créateur en soit servy et honoré.