Lékritir Danyèl Waro

Liv-la lé in voyaz. In voyaz dann tan, in voyaz dan listwar Larénion. Akoz poz lo dwa su bann mo Da- nyèl Waro la ékri, lé konm poz lo dwa su in lorloz : dabor navé Daniel Hoarau, in marmay la konu la zol, lot koté la mèr. Dann tan 1978, Romans ékri dan la zol an Frans té propoz pa « fonnkèr » (lo mo té tourn pa ankor), mé navé « poèm-maloya ». Domoun té pou sobat dann karo kann lavi, mésomansa té mank pa lokazion ri, linsolans té in manièr pou sobat (Linvansion roulèr èk kaviar, 1979). Zordi, Danyèl Waro lé konu é rokonu konm in fonnkézèr èk in san- tèr maloya... Akoz pa in « fonnkézèr-santèr politik » konm F. Marimoutou i di ? Akoz pa rapèl osi konm F. Lauret i fé, lo boug na goûté pou lo mo : sak i sant, sak i dénons, mé osi sak i fé ri la bous... In vré kasèr lo kui, in zwar anfoutan i niabou démavouz tout kalité kozé. Zordi néna cédé pou ékouté, néna film pou louké, mé oubli pa dann ron kabar i spas ankor in takon zafèr. Dalon i zwé ansanm, i rakont azot, i rakont listwar, sakinn son fason (Manz mon... /, 2018). Tik... tak... Lo tan la pasé, lé vré, mé boubou lé pa paré pou pousé dosi nout kozé : lo mo fané dann tan konm domyèl dann kèr, lo mo fané dann liv, sa i fé in litératir.
Lékip K'A